Top Gogo <3 - 4 იანვარს 2013

"ტოპ-გოგოს" გამარჯვებული თაკო თალაკვაძე "კიკალა სტუდიო-თივის" წინააღმდეგ სასამართლო დავაში ჩაერთო. მან სარჩელი გასულ კვირას შეიტანა. მოგეხსენებათ, "რუსთავი-2"-ის ეთერში ზემოხსენებული კომპანია მოდელების შესარჩევ რეალურ შოუს ატარებდა. თაკო თალაკვაძე სამ ფინალისტს შორის აღმოჩნდა, რომლებიც ლონდონში უნდა გამგზავრებულიყვნენ და ლონდონის წამყვანი სამოდელო სააგენტოების წარმომადგენლებს უნდა შეხვედროდნენ. თაკო ამბობს, რომ როგორც გამარჯვებულს, შეპირებული და კონტრაქტით გათვალისწინებული დაპირებებიდან არც ერთი არ შეუსრულეს და ერთი ჯინსის ქურთუკის გარდა ამ პროექტიდან არაფერი შერჩა. თაკო სასამართლოს გზით მოითხოვს მორალური ზიანის ანაზღაურებას და კონტრაქტის პირობების შესრულებას.

- თბილისიდან ლონდონში სამი ფინალისტი გავემგზავრეთ. როგორც ვიცოდით, პირველივე დღეს არა, მაგრამ მეორე დღიდან მაინც უნდა დაწყებულიყო შეხვედრები ბრიტანეთის წამყვან სამოდელო სააგენტოებთან. კონტრაქტში არის ასეთი პუნქტი, სადაც "კიკალა სტუდიო-თივის" უნდა მოეწყო მსგავსი შეხვედრები. იქ ჩასულები მცირე ხანში მივხვდით, რომ ისე არ მიდიოდა ყველაფერი, როგორც დაგეგმილი გახლდათ. ერთ დღეს ფოტოსესია დაიგეგმა, რომელიც ჩავარდა, არ ვიცი, ფოტოგრაფი არ იყო, თუ უარი თქვა გადაღებაზე. დეტალებში არ ჩაგვახედეს, ეს ისაა, რასაც, უბრალოდ, ყური მოვკარი. მერე, როგორც მახსოვს, სალონში უნდა გვქონოდა ვიზიტი, ესეც გადაიდო. თანდათან ვრწმუნდებოდი, რომ არაფერი არ კეთდებოდა. ფაქტობრივად, გოგონებს მოგვეცა საშუალება, ლონდონში გაგვესეირნა. ექვსი დღიდან მხოლოდ ერთი დღე წაგვიყვანეს თავიანთი ინიციატივით. ქალაქი დავათვალიერეთ, ჩავედით და ჩამოვედით, თითქოს დასასვენებლად ვიყავით.

- გამარჯვებულად როგორ აგარჩიეს?
- სანამ წამოვიდოდით, ბოლო დღეებში ისეთი საუბრები მიმდინარეობდა, რომ ვფიქრობდი, ფინალი საერთოდ აღარ შედგებოდა, რადგან პატიმრების წამების კადრების გავრცელებას დაემთხვა ჩვენი პროექტის დასასრული. მერე, რადგან გადაწყდა, რომ ფინალი აუცილებლად გასულიყო, დამასახელეს "ტოპ-გოგოს" გამარჯვებულად. ჟიურიში იყვნენ ოქსანა, სალომე და ასევე ერთი ფოტოგრაფი. ჟიურიში ასევე იყო კიკალას დაც, რომელიც იქ გვეხმარებოდა, თუმცა რაში, ვერ გავიგე. თავად გიორგი არ ესწრებოდა.

- რა პრიზი გადმოგცეს, როგორც გამარჯვებულს?
- ერთ-ერთი სპონსორის მიერ დაწესებული ჯინსის ქურთუკი. სამივე ფინალისტს მოგვცეს 150-150 გირვანქა სტერლინგი ე.წ. შოპინგისთვის, წასახალისებლად.

- თავიდანვე არ გამოთქვი პროტესტი?
- მეგონა, თბილისში რომ დავბრუნდებოდი, პირობებს შეასრულებდნენ. იმდენად სასაცილო პრიზი იყო, ვერ დავუშვი, რომ ყველაფერი ასე დასრულდებოდა.

- ჟიურის წევრებთან არ გქონია ლაპარაკი?
- ისინი დაქირავებული იყვნენ და ვერაფერს წყვეტდნენ.

- თბილისში დაბრუნების შემდეგ როგორ მოიქეცი?
- მივმართე ჩემს ადვოკატს, რომელსაც მოლაპარაკებები უნდა ეწარმოებინა სტუდიასთან. თავად აღარ მივსულვარ, რადგან ჩემს მისვლას აზრი აღარ ჰქონდა. საკმარისზე მეტი დრო გავიდა დაბრუნებიდან და ველოდებოდი, რომ თავად გადმოდგამდნენ ნაბიჯს. რადგან თვითონ არ ჩათვალეს საჭიროდ, აეხსნათ ჩემთვის, რა მოხდა, ამიტომაც გავაგზავნე ადვოკატი. მინდოდა, სასამართლოს გარეშე მოგვარებულიყო საკითხები, მაგრამ ასე არ გამოვიდა. ისინი ამბობდნენ, რომ ჩემგან არ ელოდნენ ასეთ გადაწყვეტილებას. იყო სამომავლო გეგმებზე ლაპარაკი, მაგრამ ეტყობოდა, რომ ამის გაკეთებას არ აპირებდნენ.
- როგორ ფიქრობ, ამ დაპირებებით შეგიტყუეს პროექტში?
- ვერ ვხვდები ამას. ამ პროექტის გამო დიდი სტრესი გადავიტანე. ექვს თვემდე გამომივიდა "ტოპ-გოგოში" ყოფნა, რადგან პროექტი დაგეგმილზე დიდხანს გაგრძელდა. ჩემი სამი წლის შვილი დატოვებული მყავდა დედასთან. ავთანდილის ჩვენებაზე მოვიდნენ ახლობლები და მხოლოდ იქ მოგვცეს მათთან შეხვედრის საშუალება და მე და გურანდას დაგვიტოვეს ერთხელ შვილები. ახლობლებთან შეხვედრის მეტი საშუალება არ იყო, პროექტის დაწყებამდე გვეუბნებოდნენ, რომ კვირაში ერთ დღეს სახლში დარეკვის საშუალება გვექნებოდა. მერე გვითხრეს, რომ დაპირებები რეჟისორის შეცვლის გამო ვერ შესრულდა, თუმცა ეს რატომ უნდა ყოფილიყო გადამწყვეტი, არ მესმის. რაღაცები იცვლებოდა, ხან ერთი აზრი ჰქონდათ, ხან - მეორე.
- ალბათ შეურაცხყოფილი ხარ ასეთი დასასრულით...
- რა თქმა უნდა, და როცა ბავშვი გყავს, ეს ყველაფერი ორმაგად რთულია. ამდენი დრო დავკარგე იმისთვის, რომ წარმატებისთვის მიმეღწია, მაგრამ საბოლოოდ რა მივიღე? ექვსთვიან პროექტში გავიმარჯვე მხოლოდ იმისთვის, რომ ლონდონი მენახა.

- კიდევ ერთი სტრესი ალბათ უცხო გოგონებთან ერთად ცხოვრებასაც უკავშირდებოდა.
- იყო დაძაბული ურთიერთობები, მაგრამ ზოგჯერ ეს იმისთვისაც ხდებოდა, რომ შოუს სჭირდებოდა ასე.