''მელოდია და ტექსტი'' როდესაც სიმღერის ტექსტებს ვწერდი, ჩვენი სახლის ფანჯარასთან ვიჯექი, საიდანაც კარგად ჩანდნენ ცხენები. ისინი ჩემი საყვარელი ცხოველები არიან. ჩემს წინ აკვარიუმი იდგა, ორი თევზით. ეს არსებები სამუდამოდ გამოკეტილები უნდა ყოფილიყვნენ ამ ციხეში, მაგრამ მე ვიცოდი, რომ მათ ცხოვრებაშიც იყო რაღაც საოცარი. ცხოვრება ასეთ ქილაში რაღაცით კარგია, მაგრამ უპირველეს ყოვლისა, ეს არის ხაფანგი. ამ არსებების ცხოვრება არასდროს შეიცვლება. მათ არასდროს ექნებათ მულტფილმის პერსონაჟის, თევზი ნემოს თავგადასავალი. მათ არ შეეძლოთ ცხოვრებაში რამე შეეცვალათ, მაგრამ მე ხომ თევზი არ ვიყავი!
მე დავაჯერე ჩემი თავი, რომ ცხოვრებაში წინსვლას შევძლებდი. მგონი, ეს გამომივიდა... ყველა ისტორიას აქვს დასაწყისი, შუა ნაწილი და დასასრული. მე ახლა მხოლოდ 16 წლის ვარ მოდით, გავუსწოროთ ამას თვალი. მე ჯერ დასაწყისში ვარ.
მინდა მოგიყვეთ ყველაფერი იმ დღიდან, როდესაც თვალები პირველად გავახილე, შემდეგ გადავდგი პირველი ნაბიჯი, მოვიცვალე პირველი კბილი... მე მინდა, რომ ეს ყველაფერი ყოველთვის მახსოვდეს და ეს მოგონებები ამ წიგნში დავტოვო. მე ახალი ცხოვრება მეექვსე კლასიდან დავიწყე. მაშინ არავინ იცოდა ვინ იყო მაილი საირუსი.
